台 語 的 心 聲   j0236281.gif      

 

 

  

加講一句台語,就會用ê 予一句台語生存、傳承落去。毋講台語,就會予台語滅亡、消失去。 平埔族族語,一族一族消失咧台灣歷史ê 空氣中,就是放棄講家己族語ê權利所致使ê  日常生活, 透早起來kah厝裏的人(尤其是對囡仔)、到早餐店買早頓、利便商店買物件、kah厝邊以及同事、同學、客戶相借問等等,請用台語交談,予台語會當繼續放送佇台灣的空氣中,久久長長傳承落去,沿續落去。復興台語、解救台語,需要成立「河洛事務委員會」來推sak。佔73.3%人口的「台語族」愛和齊喝出一致的心聲!  恬恬毋出聲,久來,會予人當做啞口,無人欲tshap你。

 

請將設立「河洛事務委員會」的心聲,反應予民意代表、政府官員,予in了解台語咧日常生活使用中,已經消失一半較加也,若繼續落去,本世紀就會看著台語kah平埔族族語仝款的運命。這毋是「烏白喝咻」,而是每遍「台語使用情況調查」的數據,請逐家撥出一點也時間來思考台語的將來,欲按怎來解救台語的危機?千萬毋通放外外!

 

有人將台灣本土語言頻臨滅失的險境比喻做:原住民語咧加護病房,客語咧急診,台語掛門診。毋過,經過原住民、客家事務委員會kah電視台等的設立,挹注大量國家資源予這兩个語族醫治了後,咱真歡喜看著 in 開始咧加護病房唱「娜魯灣」、急診室唱「山歌」。通獨彼个「揹黄金甕仔替tshē  水」的台語族,掛規十年的門診,無人tshap伊,無半絲仔資源的「後援」,已經「囥酒會芳,囥病沉重」,tshun一點仔氣絲仔,咧壁角 hainn- -ê  hainn- -ê 竟然毋敢喝出聲!

73.3%人口的「台語族」所繳的稅金,竟然執政者攏kā放外外,無設任何的委員會來kā扶助,「放牛食草」據在伊死活,只有選舉時講兩句仔袂hàu-koo的台語來騙選票,敢講咱比人較戇、較,無出gâu人,抑是生成就愛予人看衰、據在人處治

 

見擺咱若pih-sù=ê講欲設立「河洛事務委員會」來搶救台語,彼袂爽的語族就佇邊仔誯聲:「河洛沙文主義」,講啥物會破壞族羣和諧,這是非常夭壽無良心的陰鴆話,將近四百年來,咱攏是受統治、受壓迫的語族,從來就毋pat hiau-pai過,欲哪生有「河洛沙文主義」?

 

敢講人口較濟,就是天生的原罪?袂當爭取咱應該有的權益?咱毋通koh予這寡人騙去、分化去,這攏是看咱袂爽的語族「欲加之罪,何患無辭!」的藉口,咱愛看清楚是啥咧阻擋「河洛事務委員會」的設立?是toh一个語族咧破壞「河洛事務委員會」的通過?為著台語的生存,咱愛認清目標,逐家團結起來,和齊一致喝出通過「河洛事務委員會」!

古早人講:「兄弟若同心,烏土變成金。」向望你我同齊拍拼,動員所有的氣力,予「河洛事務委員會」早一工設立!

  

     台灣母語教師協會  第4屆理事長  鄭文海  敬上 2008.12.07

 

你若有認同本文,請傳予閣較濟人知,予「河洛事務委員會」早一日通過。

 

 

arrow
arrow
    全站熱搜

    taiuanbugikausu 發表在 痞客邦 留言(0) 人氣()