做母語的推 sak手，毋通淪為母語斷頭的劊子手。
聯合國教科文組織佇《世界瀕危語言圖譜》顯示，當今的世界語言數只賰6,912種(其中包括114種手語)，將佇本世紀末滅失一半以上，非常嚴重。照目前台灣偏孤爿獨尊華語的失策，必然的，台語、客語、原住民語將會行上平埔族語仝款的運命，消失咧台灣的空氣中。
咱佇2007年做過《台北市國小家長使用語言調查報告》，發現40歲(含) 以下的家長咧家庭、工作、生活語域中使用語言總計：華語佔59%，台語賰39%；《台北市語言活力調查》，家庭場域中，12歲以下的囡仔使用台語比例只佔8.57%，使用華語懸到80%以上的現象，證明華語咧台北市已成做新生代的母語，顛倒台語落魄做「第二習得語言」，愛佇學校中來學習。
目前國小雖然排有每週一節的母語課程，毋過一節只有40分鐘，一學期去頭捻尾賰18週，總共720分鐘久上課時間，欲達到教育單位所訂「能力指標」的聽、講、讀、寫的能力，就親像坐直昇機去月球赫呢遙遠。
雖然教育部咧97年6月24日台國(二)字第0970098491Ｃ號令修正的《國民中小學開設本土語言選修課程應注意事項》第四條規定：「國民小學每週應開設一節以上之本土語言選修課程，……，並得依學校資源狀況，利用彈性時間、晨光活動或課後活動時間，另行酌增授課節數。」毋過經過半年較加矣，猶原是樓梯響niâ，猶閣停咧原來每週一節的階段。咱佇遮建議教局當局98學年度開始，國小本土語言課程會當提高為每週二節，予頻臨滅失的台灣母語有存活落去的生存空間。
語言是人類表達、溝通創意的發明，是上珍貴的寶藏，嘛是上脆弱的。佇二月21日國際母語日，咱引用聯合國教科文組織所列的一首塞內加爾沃洛夫人的詩：「咱的母語正咧四界流目屎，因為伊家己的囡仔當咧放殺伊，放伊揹著重擔孤單死活。」做為母語的箴言。向望教育部、各縣市教育局來做母語的推sak手，千萬毋通淪為母語斷頭的劊子手。
留言列表
