j0283257.gif 台語認證的誘因何在?

 

    語言認證欲引起迴響,吸引眾人來參與,上大的要素就是愛有誘因,才會熱場、持續落去,誘因就是以利頭為主。以目前所辦的語言認證來看各語的誘因。

  

  一、他語言認證的利頭誘因

  

        華語師資認證考試,通過會當取得華語師資的資格,對外從事華語教學的工課。客語只要取得客語中高級以上認證,koh加上通過客語教學培訓,就會當擔任國中小本土語言的客語師資。原民語通過,各種升學考試會當加總分百分之三十五,其他好khang的,咱抑毋知。仝款,英語檢定考試通過,公務人員會當加薪升級,學生符合畢業條件等等。

 

以上的語言認證,攏是正面的、有實質的利頭誘因,所以攏無人反對。 

 

 

二、台語認證的利頭誘因

 

       為什麼通獨台語的認證hiah顧人怨?欲舉辦的4千萬預算,攏予人删掉?到今,攏kā責任卸予洪秀柱立委kah藍委,講什麼意識型態咧變鬼才會删掉。就是無看著有人理性、冷靜來分析背後真正的原因。

 

斯當時欲舉辦台語認證,抑無人反對。等到傳出欲「掠水鬼窒涵孔」以台語支援教員再次認證,才會當持續施教台語的風聲,隨引起反彈、反對的聲說,甚至有人遊說欲去教育部抗議的行動。後來,新的教育部出文宣示,台語支援教員無需要koh認證,才hē-suah這件tāi-tsì

  

 紲落來,箭頭指向從事台語教學的現職教師,要求in愛佇2011年前提著中高級認證,才會當一禮拜排一節台語課。對現職教師來講,教本語課不過是插花仔niâ,有排無排不常在。毋過,in嘛反彈開始運作修改這條限制,透過向新的教育部反應kah藍委的遊說兩條途徑來進行。

  

 這外來的統治政權、語族,苦無kā本語消滅tàn-sak,予伊華語一語獨尊、獨霸歸台灣,哪有可能疼痛台語?都無咧頭殼歹去講。

 

 佇立法院舉辦的4千萬預算,攏kā删掉。另外佇2009-2-20教育部隨修改公告現職教師經過進階培訓就會當持續施教本語,當然其中抑有非台羅派的人士介入運作。總講一句,立意真好的台語認證,結果是「好好鱟,thâi到屎流」的場面。

 

台語認證本來就愛舉辦,而且愛持續進行落去。上重要的愛kah利頭結合,才buē顧人怨,引起反彈。佇tsia咱建議:

 

 1、 通過本語認證中高級的現職教師、公務人員比照英語升官加錢。

 2、 通過本語認證中高級的學生,升學考試總分加30分,高級加40分,專業級加50

         來獎勵。

 3、 通過本語認證中高級的支援教員,以代理教師待遇比照。

 

以上若會當達著,本語就有前途,希望這毋是一場空夢。

 

(各位看官汝若有同意本文論點,請傳予熟似的台語頭人,予in了解

靠威脅、處罰方式是無法度推sak的,kah利頭結合才是上策!)

創作者介紹

台灣母語教師協會 Tâi-uân Bú-gí Kàu-su

taiuanbugikausu 發表在 痞客邦 PIXNET 留言(1) 人氣()


留言列表 (1)

發表留言
  • 訪客
  • 必須立法,凡是通過『台灣母語認證』者,搭乘公共交通工具一律免費優惠。像這種誘因才有辦法激發全民學台語的熱潮。
找更多相關文章與討論