母語教學的極樂世界 (李勤岸所長)     j0284168.gif  

錄自:《自由時報》〈自由廣場〉2009-5-31

 

    李勤岸(作者為國立台灣師範大學台文所所長、世界台灣母語聯盟總召集人,http://203.64.42.21/siathoan/BGLB/

 

教育部屬下的「國家教育研究院籌備處最近佇「國語日報」放風聲,想欲共一節的母語教學取消。In講「世界各國鮮少將母語列為國教課程」,「鄉土語言應回歸到彈性課程,讓各校因地制宜選修,不需要必修。」In主張全面檢討九年一貫國教課程,進行「中小學課程發展基礎模式」研究,預計二到三年內小規模修訂,五至八年內大幅度改革。In講以前母語列為國小必修是「受政治力和意識形態影響」。主要是欲設計 In講是國家教育研究?)共母語教育除掉,轉去以前「國語」獨尊的單語政策。講這才是無受政治力佮意識形態影響?現此時國中的母語課就是選修矣,敢有人咧選?其實講較白咧,選修不過是「賜死」的代名詞。

 

「世界各國鮮少將母語列為國教課程」?這個「世界」是啥物世界?是毋是「西方極樂世界」?若是地球這粒星球的世界,阮毋捌看過正常的國家無用家己的母語實施國民教育的:日本敢無用母語實施國民教育?美國敢無使用母語實施國民教育?歐洲聯盟二十七國有佗一國無使用母語實施國民教育?連中國嘛攏使用母語來實施國民教育,In佇廣東的國校就使用廣東話,佇江西的國校就使用江西話,普通話通常是到大學階段才使用來做共通語教學。敢講著共母語「賜死」按呢才無意識形態?才無政治力介入?這款「國家教育研究院籌備處」若毋是攏無咧研究,無著是目睭佯青瞑,予政治力牽咧戇戇旋。

 

這個聲音透露出來的信息就是反對予台灣人的母語有活路,就是欲倒退lu轉去威權的國民黨時代,欲違反全世界保護母語的潮流,欲自外佇這個世界,欲共台灣帶去另外彼個「極樂世界」!

 

taiuanbugikausu 發表在 痞客邦 PIXNET 留言(1) 人氣()


留言列表 (1)

發表留言
  • ABC
  • 講了真好

    有新聞報講:台灣純種的鳥仔愈來愈少啊
    有絕種的危機
    五日節看著草埔有一群鳥仔佇咧冤家
    詳細看才知影.是二種畫眉
    一種是咱土生土長的
    一種是外國的
    毋過土生土長的較少
    外國的較濟
    外國畫眉講:恁愛佮阮講同款的話
    袂使講恁家己的母語
    阮咧講的話逐家攏聽有
    恁的母語無人聽有
    無水準閣歹聽
    阮咧講的話叫做官方語言
    恁愛好好仔學習知否
    咱愛提升咱的素質佮函養
    外口來的人客才會尊重咱
    所以 佇這片土地 袂使講母語
    愛講官話才會使
    咱土生土長的畫眉是按呢回答:喔 袂使講母語哦
    既然按呢
    為著表示尊重恁
    阮決定無欲講官話啊
    因為彼嘛是母語
    是恁的母語
    在我看來.......哈哈......哈
    這叫做丟臉丟到國外去了
    那會按呢生
    台語的形容詞...... ...... ........
    有真濟呢
    咱是有家教的
    無好聽的形容詞......
    咱就......就好啊