鬥陣來實現台灣人的夢 施炳華

台灣人的夢是啥乜?有家己的語言、文字,有家己的文化、歷史,保持美麗的鄉土,有向望、有前途,有民主、自由,永遠生活佇這塊美麗的鄉土,……為著這个夢,每一个人攏著愛佇伊的專長領域內打拚、奮鬥,佇伊的能力範圍內,貢獻心力;台灣人共同的夢需要逐家合力,鬥陣打拚,才會當真正開花、結果,到時才會當鬥陣來享受台灣人的幸福、快樂。

2005年我向文建會申請補助建置「台灣說唱數位典藏」網站的時,外聘的委員共我提醒:「你共你一生打拚粒積的學術成果囥佇網站面頂,是無法度避免別人共你copy使用喔!」我講:「我都感覺我有真正寶貴的物件,是對台灣人有幫助的,我若無予人知影,是真拍損。」結果,一角都無減,照我申請的額數通過。2008年我向國立台灣文學館的前館長 鄭邦鎮 教授提出整理出版歌仔冊的企畫案,因為我感覺十年來我糜死糜爛佇歌仔冊的研究成果無人知影,實在是真拍損;大學研究生一直咧做仝款題材的研究,嘛有淡薄仔可惜。佇鄭館長的幫贊之下,兩年以後的即碼,這個「台灣歌仔冊資料庫網站」(包含50本歌仔冊的注音註釋、主題研究,八位歌仔先的傳記,唸歌的實錄、研究論文)年底就欲開幕。當然,代誌無迹呢簡單,一寡對歌仔冊有研究、有趣味的人攏予我牽落來鬥陣無閒。食老矣,若是我二十年來的研究、打拚的成果會當公開,對台灣文化、台語、台語說唱藝術、文學,若有淡薄仔貢獻,是足有意義的代誌,我的人生嘛無白活矣!

拍出「被出賣的台灣」電影的導演華裔美國人Will tiao(刁毓能),有想欲拍電影,呈現1980年代台灣人被統治者凌治謀殺的構想了後,煩惱毋知欲按怎窮(khing5)錢。伊有一个醫生朋友「共伊」(ka)講:「明仔載有一个醫生界的聚會,你來去共 in講看覓咧。」當伊共伊的理念講了後,現場恬寂寂。雄雄有一个徛起來講:「這種對台灣有幫贈的代誌,咱愛ka實現,我捐5000(美金)。」就安爾會場一下熱--起來,彼場捐錢袂少。全世界關心台灣的人逐家幾百幾千濟少捐,最後電影就拍完成矣,予咱會當看著「被出賣的台灣」的電影。我共這个代誌講予杜建坊知,伊講:伊嘛有捐錢。

每一个人攏有伊的夢,有人的夢是參台灣文化、台灣的前途結做伙,這種夢較歹實現,需要逐家相拱(king7)相媵(thin7)。杜建坊的建設「歌仔冊語料庫」有啥乜價值來ka1支持?詳細看伊的文章就知。我致意的是上重要的這點:有足濟人想欲研究歌仔冊(包含大學研究生),攏揣無歌仔冊文本,市面已經出版印刷出來的猶無夠濟,公家機關收藏的歹影印:無料就煮無好菜;嘛著愛好料才煮會出「十二碗台灣菜」。

「台灣歌仔冊資料庫網站」的50本是真少,干礁踏出第一步耳耳。 先生願意2700本全部公開,是大覺悟,大發心,是欲「建設台語文大業」,實現台灣人共同的夢,亦是咱每一个人的夢。

「被出賣的台灣」網站的紹介,有一橫批:

咱掖種,咱向望開花、結果、收成。

咱減彩無大產業,嘛無大志業;不過,咱會當做一个掖種的人,逐家濟少窮窮咧,就有向望,就會開花、結果、收成。

 

建坊兄:

汝這个設想,我300%贊成:第一个100%是理念同感、第二个100%是教育實益、第三个100%是個人研究有望!

所以我願意做共同執筆者、願意出15萬(隨會當寄出去)。

看猶復有啥乜吩咐,汝復加我講一聲。

  

興昌

 

 

建坊兄:

歌仔冊資料庫一事,小弟已經佮藤村兄,屏生弟講過,弟非常贊成,並建議佇1015日台灣語文學會學術會議場中,進行說明佮合作的徵求.承蒙來信說明,詢及此事之 "共同發起",於此台語研究的重大資料庫之建立,深感榮幸,弟定當全力支持,還望你繼續指點佮拍拚.專此. 並祝

道安

                                     忠司  敬上 20100916 

arrow
arrow
    全站熱搜

    taiuanbugikausu 發表在 痞客邦 留言(2) 人氣()