海嘯(津波/つなみ)，台語定名的思考問題
鄭 文 海 2011.4.2
「海嘯」，是華語的叫法，今(tsim)仔的英文借用日文「津波/浪」(つなみ)的語音號做「tsunami」；以早英文的原文是「tidal wave」原意是「潮汐波」，毋過，「海嘯」的形成與潮汐完全無關，而且「潮汐波」嘛無法度形容「海嘯」的恐怖性。
1946年4月當夏威夷的日裔美國人看著因為阿留申群島附近發生了7．8級的大地動，啟動著「大海嘯」到位夏威夷，捲起懸７、８公尺的大海湧時，雄雄喝出「津波/浪」(つなみ)的日語而登上報紙；koh加上這件「海嘯」發生了後兩年，美國政府咧夏威夷成立『太平洋津波(tsunami)警報中心』( Pacific Tsunami Warning Center)就是使用『Tsunami』這个名稱，英文就綴咧採用『Tsunami』。而且佇1963年咧國際科學會議頂嘛 kā『Tsunami』正式列入國際術語。
有人講「津(つ)波/浪(なみ)」是對「強(つよい / Tsuyoi)波/浪(なみ / Nami)」喝緊縮音做「津(つ)波/浪(なみ)」，毋管按怎「津(つ)波/浪(なみ)」(Tsunami)已經變成做國際共通語。
紲落來講「海嘯」的台語講法，有人píng《日臺大字典》，發現「海漲」、「起蛟龍」佮「津浪」並列「海嘯」。嘛有人講in就是講「海漲」、「起蛟龍」。根據《地震百問》中記載自1661年起台灣疑似「海嘯」紀錄有6遍，其中以1867年所造成的「海嘯」災害情況，較會當確定是台灣近海地區地動所引發的「海嘯」。
1867年12月18日，台灣北部發生大地動，基隆（雞籠頭，金包里）沿海山倒，地裂，基隆全市房屋倒歹，死亡數百人，基隆港海水向外海流出，港內海底露出，大湧捲入，船隻予沖上市內，造成重大災害。
換一句話來講，其他地區所講的「海漲」、「起蛟龍」這兩个語詞，並毋是真正針對地動所引起的「海嘯」來講的。Koh講「漲潮」的台語講法有：海漲、水湮(im)、暝(mî / mê)流(lâu)等。「海漲」同時欲做「海嘯」佮「漲潮」的解說，會予人插雜袂清的感受，就親像英文「tidal wave」(潮汐波)做「海嘯」的講法無適合仝款。
有人kā古冊中記載「海嘯」的各朝代的話語整理出來，有「海溢」、「海水溢」、「海潮溢」、「海水大溢」、「潮水大溢」、「海潮湧溢」、「海水日三潮」、「海唑」、「海吼、「海沸」等，咱根據這來分析，分做下面兩種：
1.以聲號名：海嘯(siàu)、海吼(háu)。
2.以形號名：海溢(ik)、海水溢、海潮溢、海水大溢、潮水大溢、海潮湧(íng)溢、海唑/噬 (音「誓」sè/sē，有「齧、食」的意思。《海鹽圖經》：「海鹽潮發，若有漚泡在釜泣，土人以為海唑」。)、海沸 (音「配」phè/phuè，有「波涌貌、怒貌」的意思。)。
台語有真濟借用(borrowing)其他語言的外來語，當然無理由去排斥使用這个國際共通語『津波(つなみ /Tsunami)』。以早的人講過的，若無sù配、sù序，咱會當改較好勢、較sù序的，就親像頂面各朝代攏有無仝的稱呼。「長頸鹿」，古早就有「麒麟鹿」的叫法，毋過「麒麟」是跤軂(lò)並毋是「頷管(kún)」長，台語改做「長頷鹿」就加足合意。語言是活的，綴著時代創造koh較合su的語詞，予台語koh較活潑、進步，是每一个台語族的共同向望。
留言列表
