台灣母語教師協會 Tâi-uân Bú-gí Kàu-su

舊曆過年期間的忌剋 (kī-khik；khioh-tih)　

人為著祈求新的一年會當有彩頭，此去大吉大利，咧新正時會有一寡

忌剋 (kī-khik；khioh-tih)，主要是欲趨吉避凶，祈求一年的好運氣。

下面是相關的傳統禁忌：

1、初一禁掃塗跤、向外潑水，取「財運無掃出、潑出」的預兆，姑不二終

       嘛愛向內掃入、潑入。而且這工禁用刀器，包括菜刀、鉸刀、剃頭刀等

      ，刀屬凶器，所以初一欲食的愛先tshuân起來，用炊的，另外的用意是欲

       予家庭主/煮婦(傳統是新婦)這工小歇一下，因為倚年逐工無閒刺刺tshuân

       過年，莫咧新正年頭就koh hiah悿。

2、初一無煮新飯，食過年暗所留的賰飯，表示舊年尾的食buē完，到今年頭

      猶有賰，像款欲予新婦莫hiah悿。

3、禁食糜，傳統認為過年食糜是散-iong-人kah病人咧食的，嘛有認為過年

      食糜，一年中若有遠路頭，會tú-著大風雨kah意外。

4、禁擃破碗盤物件，若無細膩擃破，愛用紅紙包好，等到初五「隔開」

後，才會當tàn入溪中(今仔重視環保，做一般糞溲就好。)，並愛喙念

「拍破瓷/huî，錢銀一大堆」，an-nē就會當逢凶化吉。

5、buē當kah人寃家相罵、或者講歹話，爸母嘛buē用的拍罵囡仔，向人

     討錢，總講一句愛和諧快樂，取一个好吉兆。

6、禁煎粿類，因粿類經過油煎後，色變赤色，「赤」字kah「散赤」

      的「赤」字仝音，無吉利。

7、禁用白色物件，若甜粿用赤砂，無用白糖；菜頭粿愛參蝦米、油葱、

      肉絲等，避免全白的。

8、禁啼哭，避免規年tiânn tú著哀傷的代誌。

9、初一tsa-bóo-囝無轉外家處，愛等到初二才會用的；因為外家的兄嫂

     、弟婦仔愛歇睏，將心比心。

10、初九天公生時，buē當曝衫kah舀肥，因為天公的聖誕。

11、初一禁食藥仔、補品，除了重病以外，主要取康健的好吉兆。

12、初一早毋通叫人名姓kah起床，an-nē對方規年捅天攏愛人差叫。

13、初一、初二禁洗衫：古早tsa-bóo-人「做有食無」，規年捅天攏咧做

        ， 洗衫愛去溪邊、圳溝邊洗，傳統認為水有水神，水神的生日咧初一

        初二，所以這兩工buē當洗衫，用意是欲予新婦小歇一下。

14、禁予別人撏(jîm/lîm)橐袋仔：表示規年錢銀攏會予人撏走，buē著財。

15、初一早食菜，較贏食一年齋。

16、「長年菜」（中北部是芥菜，南部則是帶根的菠薐仔菜）buē當

       切斷，tsiah會當長歲壽。

17、過年暗雞鴨愛留頭kah尾椎，講才會有頭有尾。