《安平追想曲》的台荷異國情戀時空背景
http://staff.whsh.tc.edu.tw/~huanyin/music/a/anping.php
陳達儒 作詞 / 許石 作曲 / 江蕙 主唱
身穿花紅長洋裝, 風吹金髮思情郎 ，
想郎船何往，音信全無通，伊是行船抵(tú)風浪 。
放阮情難忘，心情無的(teh)講，相思寄著海邊風，
海風無情笑阮戇。啊……，毋知初戀心茫茫。
相思情郎想自己，毋知爹親二十年，
思念想欲見，只有金十字，予阮母親做遺記。
放阮私生兒，聽母初講起，愈想不幸愈哀悲，
到底現在生抑死。啊……，伊是荷蘭的船醫。
想起母囝的運命，心肝想爹也怨爹，
別人有爹疼，阮是母親成，今日青春孤單影。
全望多情兄，望兄的船隻，早日倒轉安平城，
安平純情金小姐。啊……，等你入港銅鑼聲。
《安平追想曲》是1951年所創作的一首台語歌曲，斯當時台南音樂家許石先生以
小步舞曲的調譜成一首曲，想欲tshē一位名家來kā填詞，所以就央台南文人許丙丁
先生動筆，毋過許丙丁卻推薦另外一位台北的名人陳達儒先生，因為許石要求填詞
buē當變動原曲的旋律，致使陳達儒雖然是捷才卻也無法度隨交稿。後來，陳達儒
過年時陪牽手倒轉台南外家，聽講kah朋友去西門圓環寶美樓啉酒，聽著tsa-bóo
服務生講起安平金小姐的故事，就到安平來找tshē這段傳奇，結果只看著墳墓一門
感觸真深，倒轉了後按照許石的曲調，填落這一段兩代tsa-bóo人宿命戀情的故事，
一直傳到今。
安平追想曲所描述的時空背景，是佇十九世紀末，並毋是一般所誤認的十七世紀
荷領時期。當時安平佇同治四年(1865年)一月一日因為天津條約來開港kah外國
通商，tiā有外國船入港。
該曲描寫的是一个安平買辦商人的tsa-bóo囝kah一位荷蘭船醫發生戀情，
後來生落一ê金頭毛tsa-bóo囡仔的台灣、荷蘭異國情戀故事；這位金頭毛t
sa-bóo囡仔後來長大成人，嘛是koh像(siâng/sâng)款的運命，kah伊的阿母
仝款愛著荷蘭人，猶原是「情無結局就變掛」，毋過這ê變掛是命運創治人，兩位
前後倒轉去荷蘭的船途中，抵(tú)著大風湧沈船來失踪，此去音信全無，留落引人同情
的「情空無繼續的結局」。這是真人真事改編的歌謠，故事中的家族後代到今
猶 tuà佇安平地區。
《海角7號》描寫戰前台灣、日本的男女情戀時空，同時穿插現代版的異國愛情，
造成空前的轟動；像(siâng/sâng)款《安平追想曲》的背後台灣、荷蘭異國情戀
故事，嘛會當拍成影片予koh較濟人了解斯當時台灣的時空、人文背景。
留言列表
