台灣母語教師協會 Tâi-uân Bú-gí Kàu-su

廢除台羅的連字符(hyphen)，台羅白話文才有法度推sak！

毋知是toh一khoo天才，創造出tsiah複雜的台羅連字符(hyphen)

標記原則？ 真正是「做枷家已攑」！莫怪台羅白話文無人giàn寫！

除了愛會曉拼音，koh著每一个詞加畫一條「連字符」(hyphen“-”)

表示，真正是「脫褲子放屁」。英文、教羅攏無這種的書寫方式

，通獨kan-nā台羅愛an-nē寫。毋知伊的用意何在？一篇文章內底

攏是“-”畫來畫去，看起來敢 buē礙 gih？斯當時，就是嫌TLPA

每一字攏帶數字的聲調符號，今仔像款每个詞愛koh加畫〝-〞這一

畫，有啥物差別？

Suà落去koh著照《臺灣閩南語羅馬字拼音方案使用手冊》中的

〈臺灣閩南語羅馬字拼音方案連字符使用原則〉去標記「連字符」

(hyphen “-”)。換一句話來講，你愛 kā台語的詞法中各種「連字符」

(hyphen “-”)的標記原則記kah 清清楚楚，無者就陷入書寫錯誤

的陷阱。書面語正常是趨向簡單、容易、單純發展，但是台羅的連

字符卻是顛倒反的設限，設一寡有穗無稈的空頭，阻礙你書寫的

意願，結尾就是放棄，回歸到主流的漢羅書寫方式。

通常作文、寫作的人，無一定了解文法，但是台羅白話文的書寫，

愛先 kā深奧的台語詞法、句法變 kah一清二楚，記著「連字符」

(hyphen “-”)連寫、分寫的原則，請問有幾个人有這種把握？真正

是凌遲台語眾生！

台語界三不五時仔就會出現一寡攑蠓摔仔的散仙，kā台語舞kah

東倒西歪、花豹貍貓。若英文的書寫方式像台羅 tsiah līn複雜，

相信莎士比亞嘛 buē  giàn出世做英國的大文學家！