元宵節pò / phò-tāu 
道教的三官(天、地、水官)信仰形成三元日：舊曆正月十五為上元、七月十五為中元、
十月十五為下元；因為正月十五為上元，所以民間也稱做「上元節」。宵，夜也；嘛有
叫做「元夜、元夕」。元宵節，是過年後頭一 ê鬧-熱--拜(pái)，猶屬正月，所以也有當做
「小過年」看待。天官大帝（堯帝）聖誕，天官喜樂愛光，所以這暝「點燈(放燈)」、
「迎鼓仔燈」進行各種慶祝活動來凑鬧熱。
日本稱「上元」（じょうげん / jougen）、「小正月」（こしょうがつ / koshougatsu），
習俗有迎年神、祖靈，祈求豐收，有咧早起食「紅豆糜」的習俗。這工嘛是日本成年禮
（男性的元服禮kah女性的裳著禮）舉行的日子，所以也是成人節。
朝鮮叫「正月大滿月」（정월대만월 / Jeongwol Daemanol）、「正月大보름」
（정월대보름 / Jeongwol Daeboreum，「보름 / Daeboreum」為月圓、望日之意，或者簡稱
大보름）、上元（상원）、元宵（원소）、元夕（원석）、烏忌日（오기일）。
已早咧黃河流域，通常愛等到正月十五以後，才降落農作所需要的雨水，所以正月
十五日的天官賜福，所賜的就是適量而且著時的雨、雪，古早的皇抑是帝，攏會帶領
文武百官來齋醮祭拜，祈求風調雨順、國泰民安；所以台語有一句俗諺：
「好上元，好官員。」，意思就是上元節這工若好天，此去規年捅天攏會風調雨順、
國泰民安，若元宵節落雨歹天，連欲祭拜求天都buē順事(sī)，天都毋從欲哪有可能風調
雨順？到時這寡大官虎攏愛惙(tshuah)咧等。
抑有「偷挽葱，嫁好翁；偷挽菜，嫁好婿。」的講法，這kah古早嫁娶、生囝的
「偷俗」有關連，取伊的倚(uá)音，求一ê向望。親像「偷竹籬(笆)，好得兒。」、
「偷硓(石)，得好某。」、「偷豬盆(飼豬槽)，生卵核(生男孩)。」、
「ǹng燈跤、生卵脬(pha)。」「ǹng燈跤」猶有一種解說，古早嫁娶攏是靠媒人來牽的，
通常利用元宵暝男女雙方由爸母凑陣來相看，看有佮意就央媒人做進一步的安排，
若buē合就拍無輸贏，所以嘛有「ǹng燈跤，好嫁娶。」的意含。uì tsia咱會當看出已往
散赤的農業社會向望傳宗接代，希求添丁來加添tsa-poo的勞動力作穡凑thàn錢，以及
男女授受不親痟嫁痟娶性的需求暗示的背景。
另外一種已經失落的「聽香」習俗，古早痟欲嫁翁的tsa-bóo囡仔，會先佇厝裏燒香
祭拜神明，祈求神明指示聽香的方向，然後照指示方向行咧路裏，頭一句所聽著的話，
倒轉去厝kā神明稟報跋盃請示，翁緣是毋是到也？今仔男女自由戀愛的時代，這種
聽香的習俗已經 tè buē著時代也。
已婚的婦人人招伴出遊，講「行大路就是行大肚」快有㑗，古早人麼(mí)仔齣頭
都有。
「 乞龜」的舊風俗，到今猶有；龜粿有秫(糯)米龜、土豆龜、麻糬龜、麵龜kah
雞卵糕龜等等，「龜齡龜壽」經由廟寺宮壇的法會加持，koh較吉祥，向神明請示
跋有盃，就會用的kā龜粿帶走分享親友「食平安」。這種風俗咧無什麼通食的農業
社會算講是「賒食」的趣味，今年先食明年還雙，愈湠愈濟人分享，由神明見證
逐家攏走buē去。
「乞花」，嘛是愛跋有盃才會當乞得紙糊的花蕾或者人形的ang-仔，轉厝供奉，
藉來祈求子嗣，若有靈聖，嘛愛隔轉年的元宵加倍還神。
食元宵圓是外省例，咧1975年左右才看著外省人圓仔店，咧亭仔跤用kám模仔
貯秫米粉，然後囥紅豆、土豆、麻仔餡等，搖kám模仔予餡gô來gô去著粉成做
元宵圓仔。台灣本土元宵節是無食圓仔，kan-nā冬至才有搔圓仔。
「照月光，曝尻川，囡仔較會著牀。」婦人人相信咧上元暝到外口去照月光
較會著胎。tsa-bóo囡仔相信「照井水，面較娞(媠)。」元宵暝
「查甫人晏睏，歲壽加一輪。」總講一句，就是愛去外口行行踅踅的湊鬧熱，
莫守咧厝裏。
留言列表
