敬請宜蘭林聰賢縣長設立台語族的「台語事務委員會」

傳承、發揚宜蘭特殊的腔口語言kah特色的文化。

台灣母語教師協會  4屆理事長   鄭文海 

 

宜蘭是「蛤仔難」Kavalan(CamalanKuvarawan)平埔族的原鄉,嘛是漳州人占絕大多數開創出來的美麗家園。今仔日的蘭陽平原,是斯當時吳沙先賢帶領千外人先民,兩百外鄉勇,一人一支斧頭剉樹抽籐、鋪橋造路、流血流汗、一點一滴、寸土寸地所拍拼開墾出來的成果。

宜蘭好山好水,有伊特殊的語言腔口kah特色的文化,在在攏需要國家的資源去保護、傳承、發揚。毋過,佇强勢的華語kah原委會、客委會的三方夾擊之下,台語已變成上弱勢的語言,無半个專屬政府機構相thīn,台語的推sak遭遇公家資源「後援」的欠缺,對新一代來講,母語顛倒是華語,台語已變成第二習得語言,必需佇學校來學習。

有人將台灣本土語言頻臨滅失的險境比喻做:原住民語咧加護病房,客語咧急診,台語掛門診。毋過,經過原住民、客家事務委員會kah電視台、電台等的設立,挹注大量國家資源予這兩个語族醫治了後,咱真歡喜看著 in 開始咧加護病房唱「娜魯灣」、急診室唱「山歌」。通獨彼个「揹黄金甕仔替人tshē  風水」的台語族,掛規十年的門診,無人tshap伊,無半絲仔資源的「後援」,已經「囥酒會芳,囥病沉重」,tshun一點仔氣絲仔,咧壁角 hainn- -ê  hainn- -ê ,毋敢喝出聲! 

73.3%人口的「台語族」所繳的稅金,竟然執政者攏放外外,無設任何的委員會來扶助,「放牛食草」據在伊死活?

宜蘭有原民會、客委會,為啥物獨獨無台語族的事務委員會?咱誠懇呼籲宜蘭林聰賢縣長提出前瞻遠見、展現魄力,設立「台語事務委員會」,為台灣本土樹立風範!予全台灣做一个示範kah帶頭。嘛懇請各位台語先進,呼請汝的縣市政府設立「台語事務委員會」,尤其是綠色執政的南部地區!

arrow
arrow
    全站熱搜

    taiuanbugikausu 發表在 痞客邦 留言(0) 人氣()